LAOAG CITY – Adda ti pakabuklan a 518 a tattao ti natay idiay Tanzania manipod iti “unnatural causes” iti nadamsak a tignay-protesta kalpasan ti general elections iti napalabas a tawen, no sadinno a daytoy ti naiget nga im-imbestigaren ti commission of inquiry.
Nupay kasta, saannga inbaga ni Commission chairman Mohamed Chande Othman no siasinno ti responsable dagiti napasamak a pammapatay ken inrekomendar na ti naan-anay a pannakaimbestigar ti napasamak.
Immunan nga ak-akusaran ti opposition parties ken human rights groups ti security forces a nangipatungpal ti brutal crackdown kadagiti nagprotesta kontra iti gobierno.
Maipalagip a ti naideklarar a nangabak iti napalabas nga eleksyon idi Oktubre 2025 ket ni President Samia Suluhu Hassan a nakagun-od ti 98% a botos no sadinno nga indiskribir ti oposisyon kas “mockery” ti demokrasya.
Inpetteng met ti presidente a ti naipatungpal nga eleksyon ket patas ken transparent.
Pinabasol na dagiti gangannaet iti napasamak a kinadamsak ken kunana a paset daytoy ti kalikagom a mapadisi iti pwesto.
Naamoan a kaadoan kadagiti natay ket lallaki nga umabot iti 490.
