LAOAG CITY – Kinumpirmaran ti National Bureau of Investigation (NBI) nga authentic ken saan nga aramid ti artificial intelligence ti agwarwaras a “kill threat” video ni Vice President Sara Duterte kontra kada Presidente Ferdinand Marcos Jr., First Lady Liza Araneta-Marcos ken dati nga House Speaker Martin Romualdez.
Iti panagdengngeg ti House Committee on Justice, kuna ni National Bureau of Investigation Agent John Mark Calilung a dimmalan iti naiget a panangtingiting ti nasao a video iti babaen ti Affidavit of Authentication of Digital Evidence.
Ti video ket inaramid idi Nobiembre 23, 2024 kagiddan ti pannakaibalud ti chief of staff ti bise presidente a ni Zuleika Lopez kalpasan a na-contempt iti Kamara de Representantes.
Naminsan a nairuar ti nasao a video iti impeachment proceedings no sadinno a nangngeg ni Duterte a nagibbat ti nadadagsen a sarita ken maipagarup a pangta kontra kadagiti nadakamat nga opisial.
Inbatad ni Calilung, nakikoordinar ti National Bureau of Investigation iti Meta tapno mapreserbar ti orihinal a kopya ti video pakairamanan ti URL, screen recording ti livestream ken hash value computation, maysa a digital “fingerprint” nga agbalbaliw no na-edit ti file.
Kabayatanna, kuna ni National Bureau of Investigation Director Melvin Matibag nga agtultuloy ti imbestigasion tapno maduktalan ti maibagbaga nga indibidual a kinasarita ti bise presidente mainaig iti panangpangta.
Inlawlawagna a karaman nga im-imbestigaran ti sumagmamano nga indibidual nga adda ti asideg a koordinasion iti bise presidente pakairamanan dagiti agdama ken dati a miembro ti Vice Presidential Security and Protection Group (VPSPG).
Basar iti imbestigasion ti National Bureau of Investigation, maibilang a seryoso ti nasao a pangta isut gapuna a nangipiladan ti kaso a grave threats ken inciting to sedition.
Agtultuloy a tingtingitingen dagiti otoridad ti kalawa ti insidente nangruna ket karaman ditoy ti maikadua a kangatoan nga opisial ti pagilian.
