LAOAG CITY – Nakapasan iti House Committee on Government Enterprises ti House Bill No. 207, ti nailungalong a gakat a mangipababa ti optional retirement age dagiti empleado ti gobierno, karaman dagiti mangisursuro iti pampubliko a pagadalan iti tawen a 56 manipod iti 60.
Segun ken ni House Deputy Minority Leader ken ACT Teachers Party-list Rep. Antonio Tinio, a maysa kadagiti co-author ti nailungalong a gakat, maysa a napateg nga addang ti panangaprubar ti komite iti nasao a gakat agturong iti ad-adda a makatao a retirement policy para kadagiti mangisursuro ken empleyado ti gobyerno a nangilatang iti biagda iti serbisyo publiko.
Naipalaon pay iti nasao a gakat ti pannakaipaay ti gundaway para iti pudno a panagpili tapno makapagretiro iti tawen a 56 kalpasan ti nakaro a bannog wenno “burnout” nga intunda ti nadagsen a trabaho.
Inpaganetget ti agpanpanday linteg a ti nasao a gakat ti sungbat it nabayagen a kidkiddawen dagiti mangisursuro.
Inlawlawag na met a ti gakat ket saan a mangkissay iti tawen ti compulsory retirement no di ket palawaen na laeng ti opsyon para iti nasapsapa a panagretiro.
