LAOAG CITY – Naragsak nga inpakaammo ni Mayor Georgina Guillen iti ili ti Piddig nga adda ti 233 a senior citizens iti nasao nga ili ti nabenepisiaran ti libre a panagbuya ti sine.
Segun kenkuana, ti dati ket maipatpatungpal ti nasao a programa iti kada bulan ngem inaramidda itan ti kada quarter.
Inbatadna nga isuda ti umuna nga ili ti nangipatungpal ti nasao a programa no sadinno nga addan ti uppat nga ili ti nangadaptar ti kapada a programada.
Kunana a napintas daytoy a programa para kadagiti natataengan nga umili tapno adda met ti liwliwa para kadagiti lolo ken lola iti ili ti Piddig.
Inlawlawagna nga ibaklay pay ti lokal a gobierno iti ili ti Piddig ti lugan a pagluganan dagiti senior citizens kasta pay ti libre a maipaay a taraon kadakuada.
Innayonna nga addanto pay ti sumaruno a bansada a senior citizens a mabenepisiaran ti libre a panagbuya ti sine inton sumaruno a lawas.
Maipalagip a saanen daytoy ti umuna a daras a nangisayangkat ti libre a panagbuya ti sine ti lokal a gobierno iti ili ti Piddig para kadagiti senior citizens.
