LAOAG CITY – Pormalen a nalukatan ti Animal Bite Treatment Center Building ditoy siudad ti Laoag a masarakan iti abay ti City Health Office.
Segun ken ni Dr. Rodrigo Catcatan, mangidadaulo ti City Health Office, babaen iti daytoy ket addan ti nalawlawa a pasdek a pagturungan dagiti makagat ti aso ken pusa ken para iti al-alisto a serbisio ken pannakatratar dagiti pasiente.
Inbatadna a prioridad ti gobierno siudad babaen iti administrasion ni Mayor James Bryan Alcid iti pannakasaluad ti salun-at dagiti residente ditoy siudad iti pananglaban ti rabies.
Malaksid iti daytoy, kuna ni Dr. Catcatan a ti maysa a kangrunaan a maipagunamgunam iti responsable a panagtaraken ti aso ken pusa nangnangruna ket adda dagiti kaso ti animal bites ti siudad.
Naammoan a ti aktibidad ket inatendaran dagiti opisial ti siudad iti panangidaulo ni Mayor Alcid, pannakabagi ti Department of Health Regional Office ken Ilocos Norte DOH Provincial Office.
Maipalagip nga inrakurak ni Catcatan a babaen ti nasao a pasdek ket makaipaay ti libre nga anti-rabies vaccine dagiti residente ditoy siudad ti Laoag.
