LAOAG CITY – Naipresentar iti maikatlo nga aldaw ti impeachment trial ni Vice President Sara Duterte ti maysa a video clip ti emosyonal a press conference ni Atty. Zuleika Lopez idi Nobyembre 23, 2024.
Inusar daytoy ni Defense Counsel Atty. Carlo Joaquin Narvasa iti cross-examination ken ni National Bureau of Investigation (NBI) Senior Agent John Mark Calilung tapno bukitkitan ti konteksto ken kredibilidad ti naisayangkat nga open-source investigation ni Calilung iti baet paylaeng ti pannakatratar iti Article 4 ng Articles of Impeachment.
Iti naipakita a video clip kabayatan ti panagsaludsud ni Atty. Narvasa ken ni Agent Calilung, makita ti emosyonal a ni Usec. Zuleika Lopez, Chief of Staff ti Office of the Vice President nga agsangsangit kalpasan a napatawan ti contempt iti Kamara de representantes.
Inrakurak na ti naiget a panagamak na para iti biagna gapu ti pangta a pannakaiyakar na iti Correctional Institution for Women iti Mandaluyong City.
Dinillaw ti depensa dagiti nakasurat iti transcript nga inaramid ni Calilung no sadinno nga inpetteng ni Narvasa nga adda dagiti “loophole” wenno kurang a sarita kas ti “detainee” ken “accused” nga inibbatan ni Lopez ngem saan a naikabil iti opisyal a dokumento ti NBI.
Inpaganetget pay ti depensa a ti nagbalin a rakurak ni VP Sara Duterte mainaig iti maipagarop a “kill order” ket bunga laeng ti emosyon ken panagamak na iti napasaran ti Chief of Staff na ken saan a maysa a pudno a kriminal a pangta.
