LAOAG CITY – Pormalen nga inrugi ti pagilian ti electronic visa (e-visa) program para kadagiti eligible travelers nga aggapu idiay Denmark, Faroe Islands ken Greenland basar iti Department of Foreign Affairs (DFA).
Mabalin nga agaplikar dagiti foreign nationals dagiti nasao a lugar kabayatan nga agnanaed iti pagilian ti sumurok 30 nga aldaw ti e-visa iti evisa.gov.ph ken agbayad ti umno a fees wenno bayadan babaen iti direct bank transfer.
Inlawlawag ni Foreign Affairs spokesperson Analyn Ratonel nga agtalinaed nga entitled iti 30 days visa-free entry iti Pilipinas dagiti Danish nationals ken travelers aggapu iti Faroe Islands ken Greenland nga addaan ti Danish passports.
Basar iti Department of Foreign Affairs, ti Philppine e-Visa ket maipaay kadagiti gangannaet nga umay iti pagilian para business, leisure, medical treatment, training ken panagatendar iti conferences, meetings, workshops wenno seminars.
Iti e-Visa system ket mabalin a ma-access ti aplikante ti e-visa babaen iti computer, laptop wenno mobile devices ken mabalin nga ipakita iti digital wenno printed format no sadinno a saan a masapul nga ipigket ti e-visa iti pasaporte.
Naammoan a kalpasan a maiyisyu ti e-Visa ti Philippine Embassy iti Copenhagen, kasapulan a sungbatan ti traveler ti online Philippine e-Travel registration form iti uneg ti 72 nga oras sakbay ti departure.
Kuna pay ni Ratonel a paset ti e-Visa launch ti Department of Foreign Affairs ket para iti Denmark ti digitalization efforts ti visa application tapno pagbalinen a nasaysayaat, secure ken accessible babaen ti online platform.
Inlawlawag ti Philippine Embassy iti Denmark a saan a mabalin nga i-convert wenno sukatan ti e-Visa iti sabali a klase ti visa ken saan nga extendable ti authorized period of stay.
Para kadagiti travelers a kalikagumna nga agnaed iti pagilian para iti gagem nga agbasa, agtrabaho ken sabali pay a non-tourism purposes ken dagiti Danish-issued convention wenno alien passpost holders, kasapulan latta ti ag-book ti appointments iti online portal iti embahada ken agaplikar ti regular visa sticker.
