LAOAG CITY – Imbilin ti Sandiganbayan Third Division ti independent medical examination ni Senador Rodante Marcoleta tapno maamoan no masapol pay ti panagtalinaedna iti Philippine National Police (PNP) General Hospital.
Dinutokan ti korte ti UP-Philippine General Hospital Director wenno ti pannakabagi ti ahensia nga i-check ti senador iti tallo nga aldaw ken mangisubmitirda ti report no adda pay ti naananay a rason tapno agtalinaed pay laeng ti senador iti ospital.
Basar kadagiti doctor ti Philippine National Police, simmayaaten ti kondision ni Marcoleta ken mabalin daytoyen nga agbiahe ngem irekrekomendarda ti panagtalinaed na pay laeng daytoy iti ospital agingga a makompletona ti antibiotic treatmentna.
Immunan nga imbilin ti Sandiganbayan ti pannakaiyakar ni Marcoleta iti New Quezon City Jail ngem saan pay daytoy a naipatungpal gapo iti pannaka-confinena iti Philippine National Police General Hospital.
Maipalagip a sumangsango ni Marcoleta iti kaso a plunder ken tallo a panaglabsing iti Anti-Gift Law mainaig iti maipagarup saanna a panangdeklarar ti ₱75 million a donasion a nausarna idi 2025 elections.
