LAOAG CITY – Nagkiddaw ti Department of Social Welfare and Development (DSWD) ti sumurok-kumurang a P260 billion agingga ti P270 billion a budget para iti 2027 no sadinno a ti kadadakkelan a paset ti budget ket para iti Pantawid Pamilyang Pilipino Program (4Ps) ken Assistance to Individuals in Crisis Situations (AICS).
Segun ken ni Department of Social Welfare and Development (DSWD) Secretary Rex Gatchalian nga addaan ti P100 billion ti nailatang para iti Pantawid Pamilyang Pilipino Program (4Ps) a mangtulong kadagiti marigrigat iti babaen ti edukasion, healthcare ken nutrision.
Mainaig iti daytoy, addan ti P30 billion agingga P60 billion a nailatang para iti Assistance to Individuals in Crisis Situations (AICS) nga inpaay ti insigida a tulong pinansial kadagiti indibidual ken pamilia a makapaspasar ti krisis.
Ti maibati a pondo ket usaren para iti Walang Gutom Program, Pag-abot Program, Project Aruga ken ti child protection initiative.
Inbatad pay ni Gatchalian a palawaen ti ahensia ti Parent Effectiveness Sessions iti babaen ti Protective Services ken Family Development Sessions iti babaen ti Pantawid Pamilyang Pilipino Program (4Ps) tapno matulungan dagiti nagannak a masolusionan dagiti risgo a sangsangoen ti agtutubo iti digital age.
Mainaig iti daytoy, plano pay ti Department of Social Welfare and Development (DSWD) a mangipatakder ti lima a nayon ti regional residential facilities para iti rehabilitasion ti children in conflict with the law.
Kabayatanna, ti nasao a budget ket nailatang para kadagiti prioridad iti social protection nga inrakurak ni Presidente Ferdinand “Bongbong” Marcos Jr. iti maikalima nga State of the Nation Address-na.
