LAOAG CITY – Immapela da Senador Christopher “Bong” Go ken Senador Robinhood Padilla a lawlawagan no ania ti listaan dagiti proyekto nga ibagbagada nga insubimitirda iti Department of Public Works and Highways (DPWH).
Daytoy ket adda ti pakainaiganna iti alegasion ni dati a Department of Public Works and Highways Secretary Manuel Bonoan a nagisubmitir ti listaan dagiti infrastructure projects dagiti nadakamat nga agpanpanday linteg no sadinno nga adda ti P500 million nga alokasion pay iti kada Senador.
Inbatad ni Go a masapul a lawlawagan no ania a listaan ti dakdakamaten gapu ta sigurado nga awan ti inpasana a listaan dagiti proyekto ken ni dati a Department of Public Works and Highways Usec. Roberto Bernardo a manipud iti opisina daytoy.
Depensa ti Senador, natural laeng a maaddaan ti koordinasion ken komunikasion ti lehislatura ken ehekutibo partikular iti panagbantay ti umno nga implementasion kadagiti proyekto aglalo ket masansan a babbabalawenna dagiti departamento no adda dagiti arungaing, kiddaw wenno report kadagiti proyekto manipud kadagiti nasusulinek a lugar.
Nagpanawagan met ni Padilla a kumpletoen ti report gapu ta nadakamat ti naganda ngem saan a nalawag a daytoy ket para iti “for later release.”
