LAOAG CITY – Naipaayan ti baro a fire truck ti ciudad ti Laoag a mausar iti panagresponde kadagiti emergency, nangruna kadagiti uram.
Segun kenni Fire Senior inspector EDISON REYES, ti City Fire Marshal ditoy ciudad ti Laoag, adda ti 3,000 liters ti kapasidad ti truck ken mabalin a nalaka ken al-alisto nga agresponde iti man dadakkel wenno babassit nga uram.
Kunana a “Penetrator” ti tawag iti truck gapu ta mabalin a sumrek kadagiti akikid ken narigat a kalsada a saan a nalaka a pagserkan dagiti dadakkel a fire truck.
Daytoy ket makatulong iti panangipaay iti napartak a serbisyo kadagiti lugar a narigat a madanon dagiti regular a fire truck.
Innayon na nga iti testing, nakitana a ti truck ket adda ti manual operation ken moderno a sistema a mabalin a mausar babaen ti panangpindut.
Inbatad na pay a naggapu ti baro a fire truck iti Metro Manila ken naipaay iti siudad ti Laoag.
Namnamaen ni Reyes a makatulong ti baro a fire truck iti naparpartak a panagresponde ti Bureau of Fire Protection kadagiti insidente ti uram, nangruna kadagiti lugar a nailet ken narigat a pagnaan dagiti dadakkel a fire truck.
