LAOAG CITY – Namnamaen ti Department of Finance a ti average yearly income dagiti Pilipino ket ‘on track’ iti agarup a doble iti sumaruno nga innem a tawen a P378,000 gapu iti lumawlawa a middle class.
Segun ken ni Finance Secretary Ralph Recto, iti agdama, ti average income iti kada tao ditoy Pilipinas ket $3,541 wenno P206,000 iti tunggal tawen.
Inbatadna a ti napartak nga income growth ket gapu metten iti natibker a local labor market a mangidurduron iti panaggatang dagiti tattao nga ‘accounted’ para iti nasurok a 70% ti ekonomia.
Basar iti Philippine Statistics Authority, bimmaba ti unemployment rate iti 3.5% idi Pebrero.
Iti kapada a panawen, nag-improve ti kalidad ti trabaho nga adda ti panagbalbaliwna ti underemployment rate iti 12.4%.
Dinakamat met ni Recto dagiti dadduma pay a ‘key driver’ ti domestic consumer demand, daytoy ket ti agtultuloy a remittances manipod kadagiti Overseas Filipino Workers.
