LAOAG CITY – Adda paylaeng idiay Islamabad, Pakistan ni US Vice President JD Vance para iti serye ti negosasyon iti nagbaetan ti Estados Unidos ken Iran mainaig iti pannakaiyalud-od ti agdama a ceasefire.
Iti statement ni Vince, inbatad na a naaddaan ti “substantive discussions” ngem awan ti napagnunumoan a katulagan.
Ti taripnong ket nagpaot ti nasurok a 21 nga oras manipod Abril 11 agingga iti abril 12 nga inatendarn dagiti nangibagi iti Estados Unidos, Iran, ken Pakistan.
Karaman pay iti delegasyon ti Amerika ni US special envoy Steve Witkoff ken ni Jared Kushner, manugang ni Presidente Donald Trump.
Gagem ti negosasyon nga iyalud-od ti ceasefire a naipatungpal idi Pebrero 28 iti babaen ti Operation Epic Fury, kalpasan ti innem a lawas a gubat iti Iran a nangitunda ti nakaro a perdisyon ken krisis iti ekonomiya.
Basar kadagiti report, karaman kadagiti sensitibo nga isyu ti uranium enrichment program ti Iran, seguridad iti Strait of Hormuz, ken dagiti kondisyon para iti natibtibker a ceasefire.
Iti baet ti pannakapaay, nagtalinaed silulukat ti posibilidad ti baro a round dagiti negosasyon kadagiti sumarsaruno nga aldaw.
Ti pannakapaay ti negosasyon ket makitkita a dakdakkel a problema iti Iran nga agtultuloy a sumangsango iti naiget a pressure manipod iti international community ken iti epekto dagiti sanctions.
Para iti Estados Unidos, nagtalinaed a natalged ti posisyon a saan a mangipaay ti kompromiso agingga a saan a nasolbar ti kangrunaan nga isyu iti seguridad ken nuclear program.
