LAOAG CITY – Naragsak nga inpakaammo ni Ms. Ryan Rollaine Simon, mangidadaulo ti Municipal Disaster Risk Reduction and Management Office nga awan ti seryoso a problema a napasamak kabayatan ti Undas 2025 iti ili ti San Nicolas.
Segun kenkuana, daytoy ket babaen ti naiget a panagbinnuligda iti Philippine National Police, Bureau of Fire Protection, Rural Health Unit pakairamanan dagiti barangay tanod, advocacy groups ken dadduma pay.
Inbatadna nga adda dagiti nakasagana a behikulo a nangilugan kadagiti senior citizens ken Person’s With Disability a naitulod kadagiti tanem dagiti ay-ayatenda iti biag.
Inlawlawagna nga adda ti naka-standby nga ambulansia iti ruar ken uneg iti kamposanto iti ili ti San Nicolas tapno maipasigurado ti napaspas a panagresponde dagiti otoridad.
Innayonna nga agtalinaed nga agbantay ti Philippine National Police ken ag-roving ti Bureau of Fire Protection iti nasao a kamposanto inton bigat para kadagiti sumaruno pay a bumisita kadagiti tanem dagiti ay-ayatenda iti biag.
Mainaig iti daytoy, kuna ni P/Capt. Sygman Benigno, Hepe ti San Nicolas Municipal Police Station nga awan dagiti nakumpiskarda nga aniaman a maipawil a banag a maiserrek iti kamposanto.
Kabayatanna, nagpalagip ni Fire Senior Inspector Heinrich Gudoy, Municipal Fire Marshal iti ili ti San Nicolas kadagiti residente a siguradoen nga awan ti nabaybay-an a nakasaksak nga aniaman a klase ti appliances wenno gadgets kadagiti pagtaenganda idi nagturong dagitoy iti kamposanto tapno maliklikan ti uram.
