LAOAG CITY – Ginandat ti maysa a babai ti agtapwak iti Gilbert bridge ditoy ciudad ti Laoag gapu iti maipagarop a depresyon.
Segun ken ni Police Lt. Col. Rafael Lero, ti chief of police ditoy ciudad ti Laoag, ti biktima ket agtawen ti 36, residente iti Barangay 6 iti ili ti San Nicolas.
Inistorya ni Lero nga idi gandaten ti babai ti agtapwak ket nasiputan ti maysa a lalaki isut gapuna a dagus na a napan ginammatan tapno malapdan ti dakes a panggep ti maseknan.
Iti imbestigasyon ti PNP-Laoag, naamoan a nagriri ti babai ken ti live-in partner na kalpasan a naamoan ti lalaki a nakautang ti biktima.
Naamoan a saan a kayat ti lalaki nga umut-utang ti babai isut gapuna a napalalo ti pungtot na kenkuana ken possible a daytoy ti nagsinaan da.
Inbaga pay ni Lero nga adda ti muriatic acid iti bag ti babai isut gapuna a mamati a mabalin a dua ti pagpilpilyan na nga agpakamatay, daytoy ket ti agtapwak iti rangtay wenno uminom ti muriatic acid.
Kalpasan ti pannakataming ti babai iti Laoag City General Hospital (LCGH) ket napalubusan met laeng a nagawid iti balay da.
