LAOAG CITY – Napaltu-paltogan ti maysa a babai nga inhinyero iti Sitio Nagmarcaan iti Barangay San Marcelino iti ili ti Dingras.
Ti biktima ket agtawen ti 31 ken residente ti nasao met laeng a barangay.
Iti inisyal nga imbestigasion, agarup alas otso ti rabii, kabayatan a dumaldalyasat ti maysa a residente a nakalugan ti motorsiklo ket ditoy a nakitana ti Mitsubishi L300 nga agmaris ti puraw a nagluganan ti biktima a natnag iti kanal.
Gapu iti daytoy, immasideg ti nasao a residente iti lugan ket ditoy a nakitana ti biktima nga agdardara ti sumagmamano a paset ti bagina rason nga insigida a naitaray daytoy iti Dingras District Hospital ngem naiyakar iti Gov. Roque Ablan Sr. Memorial Hospital.
Mainaig iti daytoy, rumrummuar a natamaan ti bala ti paltog iti paset ti buksit ken abaga ti biktima.
Narekobre dagiti otoridad iti nakapasamakan ti krimen ti lima nga empty cartridge ti calibre 45 a paltog.
Iti agdama, agtultuloy ti iwaywayat nga imbestigasion dagiti otoridad ti motibo ken pakabigbigan dagiti suspek.
