LAOAG CITY – Pimmusayen ti maysa a baket a nadungpar ti maysa a motorsiklo iti paset ti Barangay 5 iti ili ti Bacarra idi biernes, Nobyembre 8.
Nabigbig ti biktima a ni Corazon Umingan y Natividad, agtawen ti 62, balo ken residente met laeng iti nadakamat a barangay idinto a ti nangiturong ti motorsiklo ket ni Mr. Reymar Guererro, agtawen ti 26, baro ken residente iti Barangay 1 iti ili ti San Nicolas.
Maipalagip a kabayatan ti panagdalyasat ti baket iti kalsada ket ditoy a nadungpar ti nakamotorsiklo a ni Guererro.
Naitaray ti biktima iti Governor Roque Ablan Senior Memorial Hospital (GRASMH) ngem naiyakar iti Mariano Marcos Memorial Hospital and Medical Center iti ciudad ti Batac nga isun ti nakatayan na gapu kadagiti sinagaba na a sugat kangrunaan na iti ulo na.
Iti imbestigasyon ti PNP, saan a nakita ni Guererro ti baket ken rumrumuar a sabali met ti kitkitaen ti biktima kabayatan a dumaldalyasat ti kalsada.
