LAOAG CITY – Masapol nga adda ti maikabil a pagilasinan kadagiti amin a pagtaengan a nakalockdown ditoy ciudad ti Laoag.
Daytoy ti inbatad ni Miss Robee Ann Felipe, maysa kadagiti team leaders ti DILG contact tracers ditoy siudad.
Segun kenni Felipe, daytoy ti maysa a wagas tapno maballaagan dagiti residente a saan a sumsumrek kadagiti nasao a pagtaengan tapno saan da a maakaran ti covid-19 virus.
Inaramid daytoy ni Felipe kalpasan nga adda ti report a maipagarop a simrek lattan ti maysa nga indibidual iti naka-lockdown a balay rason a naikonsiderar nga exposed iti nasao a sakit.
Inbaga ti opisyal a nawaya dagiti maseknan nga agpili nu caution tape wenno barikada ti maipan iti sango ti balay da.
Inlawlawag pay ti opisyal a sipud nangrugi ti pandemya ket kastoyen ti sistema isut gapuna a masdaaw nu apay ita lang nga adda dagiti agreklamo.
Maipalagip nga adda dagiti sumagmamano a netizens nga immapela a saan a mausar ti caution tape gapo ta mangitunda daytoy ti depresyon ken diskriminasyon kadagiti nakaisolate.
