LAOAG CITY – Target ti kamara de representantes a makita ti bank records ni Vice President Sara Duterte kas a paset ti impeachment proceedings.
Daytoy ket basar ken ni House Deputy Speaker Representative Paolo Ortega.
Iti maysa nga statement, inrakurak ti agpanpanday linteg a dagiti akusasyon a naidatag iti maikapat nga impeachment complaint ket seryoso ken makaalarma no sadinno a basar iti sumagmamano a claims ket adda dagiti bank account, properties ken transaksiyon ti kwarta ti maipagarop a saan a naideklarar iti Statement of Assets, Liabilities and Net Worth (SALN) ti Bise Presidente.
Iti maikapat nga impeachment complaint a naipila kontra iti Bise Presidente idi miyerkules, naakusaran ni Duterte ti maipagarop a betrayal of public trust ken culpable violation of the Constitution.
Segun ken ni Ortega, no maimandar kadagiti public officials nga ideklarar ti amin nga assets ken agbiag a simple,maibilang daytoy a maysa a seryoso a constitutional concern ti aniaman a ‘material omission,’ banag a saan a rumbeng nga iyaleng-aleng ti kababan a pagpandayan linteg iti kongreso.
Inlawlawag met ti agpanpanday linteg a saan daytoy a conviction, no di ket maysa a proseso.
Maipalagip a dimmakkel ti net worth ti bise presidente iti nasurok a 1,000% iti uneg ti 17 a tawen, manipod iti nasurok a P7.2 million idi 2007 ket ngimmato daytoy iti P88.5 million maibasar iti Statement of Assets, Liabilities and Net Worth (SALN) na idi Disyembre 31, 2024.
