LAOAG CITY – Inlawlawag ni Barangay Chairwoman Jesusa Mercado iti Barangay Barbar, Pinili, Ilocos Norte no apay nga ado dagiti mangbabbabalaw kenkuana iti barangay da ken uray dagiti adda iti abroad.
Inistorya na nga idi napan nakitaripnong iti munisipyo iti ili ti Pinili ket naibilin kadakuada nga isumitir da dagiti nagan dagiti kabarangayan da a rebbeng na a maikkan ti tulong iti panawen ti Enhanced Community Quarantine (ECQ) gapu iti coronavirus.
Segun kenkuana, dagiti kagawad na ti nang-assess no siasinno dagiti makuna a “Poor, Poorer, Poorest” iti barangay da.
Inbatad na a saanda pay a napan naisumitir ti listaan iti munisipyo kangrunaan na iti Municipal Social Welfare and Development (MSWD) ket adda ti maysa a senior citizen a napan nagdamag no saan a karaman iti maikkan ti tulong.
Insungbat ti kapitanan a saan a maikkan gapu ta dua a mestra ti kabbalay na.
Iti panagawid ti senior citizen ket maipagarop a nagipulong a saan da a maikkan ti tulong, ken kalpasan ti sumagmamano a gundaway ket adda manen ti napan nagdamag no saan da a maikkan ti tulong.
Inbaga ti kapitana iti maseknan a saan da pay a naisumitir ti listaan dagiti maikkan ti tulong isut gapuna nga agtalna da pay laeng.
Ditoy metten a maipagarop nga ado dagiti nangbabbabalaw kenkuana a kabarangayan na karaman dagiti adda abroad a kabagyan dagiti maseknan.
Inpakaammo na a saanna a kayat a tutupan dagiti mangbabbabalaw kenkuana gapu ta kalepleppas laeng ti pannakaopera na iti puso isut gapuna a ti anak na nga adda iti abroad ti makisarsarita kadagiti maseknan a sardengan da ti ina na gapu ta ar-aramiden na amin a pagrebbengan na kas mangidaulo iti barangay da.
Kuna ni Mercado nga idi damo ket 63 laeng dagiti kabarangay na a pinili ti MSWD ngem nakipakpakaasi nga iraman da koma dagiti dadduma a kangrunaan nga agkasapulan ket nanayunan isut gapuna a napagbalin a 91.
Naamoan a ti ili ti Pinili ket addaan ti 25 a barangay ken 2, 600 laeng ditoy ti mapili a maikkan ti tulong.
Nupay kasta, inbatad ni Mercado a dagiti napili a kabarangayan da a maikkan ti tulong ket maikkan da pay ti porma a masapol a permaan da ngem no saan da a makapasa ket adda ti posibilidad na a maikkat da.
