LAOAG CITY – Natay ni Barangay Chairman Francisco Bagay Jr. kalpasan a napaltu-paltugan iti uneg ti solar da iti Barangay 5 iti ili ti San Nicolas.
Nagsagaba ti naruay a tama iti bala ti paltog ti agtawen ti 45 a kapitan ken naitaray iti Black Nazarene Hospital ngem pimmusay bayat a maag-agasan.
Iti agdama, manarimaan ti imbestigasyon dagiti kameng ti Philippine National Police iti ili ti San Nicolas kadwa da dagiti kameng ti Ilocos Norte police Provincial Office.
Basar iti Closed-circuit television (CCTV) a nakaimuntar iti asideg ti balay ti pamilya Bagay, dagiti nangpaltu-paltog iti nasao a kapitan ket riding-in tandem suspects a naglugan ti agmaris ti asul a Yamaha aerox.
Naamoan a nakatugaw ti kapitan iti uneg ti solar da idi paltu-paltugan dagiti saan pay a nabigbig a suspek ken rumrumuar a ti nausar a paltog ket kalibre 45 basar kadagiti naala a kapsula iti nakapasamakan ti krimen.
Kabayatanna, maladingitan ni Mayor Mike Hernando iti napasamak iti supporter na a ni Barangay Chairman Bagay aglalo ket awan ti ammo na a karirriri na.
Kuna ti mayor a sipud nangrugi a nagserbi iti publiko ket maysa ni Bagay kadagiti naiget a mangsupsuporta kenkuana ken nagkaubingan da pay isut gapuna nga arigna agkabsat ti pangibilangan da iti tunggal maysa.
Innayon na nga awan dagiti naipadpadamag a napasaktan ti kapitan wenno nangireklamo kenkuana isut gapuna a maladingitan no apay a pinatay da daytoy.
Naulila ni Kapitan Bagay ti asawa ken dagiti tallo nga annak na.
