LAOAG CITY – Inlawlawag ni Barangay Chairman Jondie Bayudan iti Barangay Sto. Niño iti ili ti Nueva Era no kasanu a napasamak a namindua a nakaawat dagiti agasawa ti Social Amelioration Program (SAP) iti agduma nga ili.
Inbatad ni Bayudan a ni Mrs. Jenny Balintona ket residente iti barangay da ken isu ti pagbotbotosan na idinto a ti asawa na a ni Jerry Balintona ket taga Barangay Valdez iti ili ti Banna ken ditoy met nga agbotbotos.
Segun kenkuana, ti dua a barangay ket kali laeng ti nagbaetan da.
Inistorya ni Kapitan Bayudan nga inkabil na iti naudi nga slot ni Mrs. Balintona gapu ta kwalipikado daytoy a benepisyaryo ti SAP.
Inbaga na nga inbunong da ti Social Amelioration Package kadagiti benepisyaryo idi April 17, ngem naamoan da nga idi Marso 21 ket nagibunong met iti Barangay Valdez iti ili ti Banna ket naikkan met ni Mr. Balintona.
Iti panagdamdamag ni Kapitan Bayudan ket naamoan na kadagiti agasawa a dinamdamag met kadakuada dagiti kameng ti DSWD iti Barangay Valdez iti ili ti Banna no adda ti pinirmaan da a porma a kas ti inpaperma da met laeng iti barangay Sto. Niño iti ili ti Nueva Era.
Kalpasan a naamoan na a nakaawat a dua dagiti agasawa ti SAP ket napan na kinasarita a dagus dagitoy ket sitatallugod met ni Mrs. Balintona a nangisubli ti kwarta.
Innayon na a ti insubli a kwarta ni Mrs. Balintona ket inted da iti napili da a maysa a kabarangayan da.
