LAOAG CITY – Balligi ti naiyuswat a search warrant operation iti Sitio Gudugud, Brgy. 25 Sacritan, Pinili, Ilocos Norte a nakatiliwan ti maysa a barangay tanod.
Segun kenni PSMS Noel Gamit, Chief Investigator ti PNP Pinili, nailanad iti search warrant a biruken dagiti otoridad ket caliber 5.56 MM rifle, caliber 45, caliber 22 magnum ken nagduduma a klase na a bala.
Kalpasan ti operasyon, ti nakumpiskar nga armas dagiti otoridad ket caliber 30 carbine rifle, maysa a caliber 45, maysa a caliber 22 converted, maysa nga homemade pistol wenno ti caliber 5.56 MM, dua nga air gun rifle, magazine ken balbala.
Inlawlawag na a basar iti impormasyon da ket ti subject a barangay tanod ket masansan nga agpappaputok ti paltog ken iti panagmonitor wenno panag-validate da ket adda ti ikot daytoy a paltog.
Mainaig iti daytoy, kuna ni Gamit nga inadmitir ti tanod a kukua na ti kalibre 45 a paltog ken ti caliber 22 airgun ken ti caliber 30 carbine ket sinalda na, idinto a dagiti dua nga airgun ket rumrumwar a maipatarimaan kenkuana.
Iti agdama, ti tanod ket adda iti kustudiyar ti PNP-Pinili para iti husto a proseso.
