LAOAG CITY – Mamati ni Bombo International News Correspondent Rene Ballenas manipod idiay New Jersey, United States of America a dakkel ti posibilidad a ti Boston Celtics ti agballigi kontra iti Dallas Mavericks iti manarimaan a National Basketball Association Finals.
Segun kenkuana, saan a mailinged a nalalaing dagiti umaayam ti Boston Celtics no sadino kaadduan kadakuada ket natatayag no idasig kadagiti players a kabinnalubalda.
Inbatadna nga agtalek isuna iti Boston Celtics gapu kadagiti napinpintas a rekordda kas ti 17 a panangabak iti National Basketball Association Finals no sadino nakagun-od ti 11 nga straight winning championships ti nasao a grupo.
Inlawlawagna nga adda met dagiti saan nga agpaatiw a players ti Dallas Mavericks tapno magun-od ti balligi.
Innayonna a naruay dagiti basketball fans ti magagaran ti sumarsaruno pay a panagbinnalubal dagiti dua a basketball team.
Immuna iti daytoy, nangabak ti Boston Celtics iti Game 1 ti National Basketball Association Finals kontra iti Dallas Mavericks iti iskor nga 107-89.
