LAOAG CITY – Inlawlawag ti neurologist a ni Dr. Raymond Rosales a ti Bell’s Palsy ket kagudua laeng ti rupa ti maapektaran saan a kas ti stroke a lower part laeng ti rupa ti apektado.
Kuna na a ti sintomas ti Bell’s Palsy ket saan a maikuretret ti muging ken saan a makaisem a naimbag.
Inbatad na nga uray siasinno ket mabalin a maaddaan ti sakit a Bell’s Palsy kangrunaan na dagiti nakapsot ti resistensya na ken dagiti diabetes.
Innayon na a mabalin pay a maaddaan ti Bell’s Palsy dagiti nagpasaren ti chicken pox gapu ti Herpes virus.
Inbalakad ni Rosales a no makapasar dagiti sintomas ti Bell’s Palsy ket kasayaatan no mapan agpakonsultar a dagus iti doktor tapno insigida a maagasan, ngem saanen a naan-anay a maurnus ti rupa a naapektaran.
Mainaig iti daytoy, kuna ni Rosales a makatulong ti panaginom kadagiti naireseta nga steroids ken panangiyuswat ti facial exercises kalpasan a maapektaran ti Bell’s Palsy.
