LAOAG CITY – Agtultuloy a ngumatngato ti bilang dagiti agpospositibo iti dengue ditoy probinsia ti Ilocos Norte.
Segun ken ni Dr. Rickson Balalio, mangidadaulo ti Provincial Health Office (PHO), basar iti datos manipud idi Setiembre 1-7, ket umabot iti 403 ti kaso ti dengue idinto iti las-ud laeng ti 21 nga aldaw, manipud Setiembre 22-28 ket umabot ti 503 ti nagpositbo.
Inpakaammo ni Balalio nga iti umuna a distrito ti probinsia, ditoy siudad ti Laoag ti kaadwan ti kaso a dumanon iti 74, sarunuen ti ili ti Pagudpud nga addaan iti 53 a positibo.
Kabayatanna, iti maikadua a distrito, ti siudad ti Batac ti kangatuan nga addaan iti 106 a kaso, sarunuen ti Badoc nga addaan iti 28.
Kinunana nga iti intero a probinsia manipud idi Enero ket addan ti maysa a nairekord a pimmusay gapu iti dengue manipud iti ili ti Dingras.
Mainaig iti daytoy, agtultuloy dagiti addang ti PHO a mangipaay iti pakdaar ken pannakaammo iti publiko maipapan kadagiti panagannad kontra dengue.
Inkiddawna a rumbeng nga agkaykaysa dagiti umili kontra ken malappedan iti panagadu ti kaso ti dengue ditoy probinsia.
