LAOAG CITY – Dakkel ti nagbabaan ti bilang dagiti turista nga agturturong iti ili ti Pasuquin.
Segun ken ni Mr. John Dancel, mangidadaulo ti Municipal Tourism Office iti nasao nga ili, no idasig iti napalabas a tawen kadaytoy a panawen ti kalgaw aglalo iti naglabas a Semana Santa ket adda ti mairekordda a 500 agingga iti 1,000 a turista nga agpasiar ngem iti agdama ket narigat pay nga umabot iti 300 nangruna iti sexy beach a maibilang a prime destination dagiti turista iti ilida.
Inbatadna a ti kaadoan pay a mapmapanen ket dagiti lokal a turista ken dagiti residente iti kabangibang nga ili.
Iti baet daytoy, inpasingkedna ti agtultuloy a panangpapintas ken panangpasayaatda kadagiti tourist spots iti ili ti Pasuquin.
Mangnamnama ti Municipal Tourism Officer nga iti kabiitan a panawen ket agsublin dagiti turista aglalo ket naruay dagiti mabalinda nga idiaya iti benneg ti turismo.
