LAOAG CITY – Inpakammo ni Mrs. Marilou Sapungan, Revenue District Officer ditoy Ilocos Norte a nakalockdown iti agdama ti Bureau of Internal Revenue.
Daytoy ket kalpasan ti panagpositibo ti maysa kadagiti katrabahoan da ken kasapulan da ti ag-isolate.
Segun kenni Sapungan, ita nga aldaw ti panangrugi ti panagrikep ti opisina ken inbalakad ti health office a saan da pay laeng nga agawat ti tax payers ken awan ti transaksyon.
Inlawlawag na nga amin nga empleado ket dumalan da iti swab test intono Biyernes ken agdepende iti resulta no kaano a malukatan ti opisina.
Ummuna iti daytoy, kuna ni Sapungan a ti nagpositibo nga empleado ket naggapo iti probinsya ti Pangasinan ken idi simmangpet ditoy probinsya ket madi ti marikrikna na ken addaan ti panateng ken uyek.
Gapo iti daytoy, dimmalan iti covid-19 testing ti nasao nga empleado ken positibo iti virus isut gapo na a nag-isolate da a dagus.
Mainaig iti daytoy, inlawlawag ni Sapungan a dagiti agrenew ti business permit ken dadduma pay ket mabalin da a mapan iti opisina apaman nga aglukat gapo ta ti deadline ket agpatingga met intono Enero 31.
Nupay kasta, kuna na a ti deadline ti panagbayad ket saan nga agbaliw gapo ta adda met ti e-services wenno ti panagusar ti online.
