LAOAG CITY – Naragsak nga inpakaammo ni Engr. Joselito De Vera, Division Manager ti National Irrigation Administration ditoy probinsia a manarimaanen a maus-usar ti Bongga Pump 1 ken 2 kadagiti pagtatalonan.
Segun kenkuana, babaen ti solar irrigation pump ket makapartuat ti elektrisidad a dakkel a tulong para kadagiti mannalon ditoy probinsia.
Inbatadna a basar iti software system-da, ti sibubukel a Bongga Pump 1 ket bukbuklen ti agarup 64.87 kilowatt.
Inlawlawagna nga iti met Bongga Pump 3 ket manarimaan a maisaysayakat ti wiring-na kalpasan a naitantan daytoy gapu ta kinasapulanda nga i-repair ti building-na no sadinno a manamnama a malpas daytoy agingga iti panagngudo ti Abril.
Innayonna a nakadakdakkel a tulong kadakuada daytoy a proyekto gapu ta makissayan ti bayadanda ti kuriente iti Ilocos Norte Electric Cooperative.
