LAOAG CITY – Kinumpiramaran ni Brgy. Chairman Frederico Simpliciano iti Brgy. 16 iti ili ti San Nicolas nga adda dagiti baboy nga inkali wenno kinuriente iti barangayanda.
Patienna a nagrugi daytoy sipud iti iduduprak ti Bagyo Julian, ket kunana a nalayus dagiti baboy rason nga agmamayo dagitoy.
Nupay kasta, inbatadna a maipagarup a nagpositibo dagitoy a baboy iti African Swine Fever.
Segun kenkuana nga umabot iti 91 a baboy dagiti nakuriente ken inkalida manipud iti barangayda tapno malapdan ti pannakaiwaras ti mapapati a sakit.
Kabayatanna, pinadas nga alaen ti Bombo Radyo Laoag News Team ti kabibiangan ni Provincial Veterinarian tapno mailawlawag daytoy a banag ngem kinunana nga under surveillance daytoy.
Immuna iti daytoy, adda ti naipadanon nga impormasion ditoy Bombo Radyo Laoag maipanggep dagiti baboy a naikali a maipagarup a nagpositibo iti African Swine Fever iti Brgy. 16 San Marcos iti ili ti San Nicolas.
Iti agdama, nagpalagip ni Brgy. Chairman Simpliciano a suruten dagiti pagannurutan ti Provincial Agriculture ken Provincial Veterinary tapno maliklikan ti panagiwaras ti nadakamat a sakit.
