LAOAG CITY – Agtultuloy ti panagsukisok ti City Tourism Office tapno aprobaran ti Food and Drug Administration dagiti produkto a suka ken basi iti Barangay Bacsil ditoy siudad ti Laoag.
Segun ken ni Atty. Charito Malicad, mangidadaulo ti City Tourism Office ditoy siudad, ikagkagumaanda ti panangkitana no kasano nga aprobaran ti Food and Drug Administration tapno dagiti produkto a suka ken basi ket nalawlawa iti pakailakoanna.
Inpasingkedna ti naiget a panangsuportada kadagiti agar-aramid ti suka ken basi ditoy siudad.
Inlawlawagna a basar iti pannakisarsaritana kadagiti agar-aramid kadagitoy a produkto ket naammoan a saan pay daytoy a dimmalan iti Food and Drug Administration.
Kunana a no saan a dumalan ken aprobaran ti Food and Drug Administration dagitoy a produkto ket iti laeng lokal a merkado iti pakailakoanna dagitoy.
Kabayatanna, inpasigurado ni Atty. Malicad a dagiti produkto a suka ken basi iti Barangay Bacsil ket dumaldalan iti umiso a proseso a pannakaaramidna nga awan ti aniaman a mailalaok kadagitoy.
