LAOAG CITY – Inawagan ni Atty. Carlos Isagani Zarate, Co-Chairman ti Makabayan Bloc a paspasurot dagiti agpanpanday linteg iti Kongreso gapu iti pannakaibasura ti dua nga impeachment complaints ni Presidente Ferdinand Marcos Jr.
Segun kenkuana, ti pannakaibasura kadagiti impeachment complaints ket arig ipakpakita ti Kamara de Representantes nga iggem isuda ti Malacañang.
Inbatadna a saanda nga umannugot iti pannakaibasura kadagiti impeachment complaints ni Marcos gapu ta mamati a saan laeng a “sufficient in form” dagiti reklamo no diket “sufficient in substance” pay gapu ta supsuportaranna dagiti alegasion ti Makabayan Bloc kas ti betrayal of public trust, maipanggep iti budget insertions a nangitunda kadagiti maanomalya a flood control projects ken dadduma pay.
Inlawlawagna a para kadakuada ket umdas ken adda ti pangibasaran tapno ituloy ti proseso iti panangtingiting ti Committee on Justice kadagiti impeachment complaints ni Marcos.
Kunana a ti impeachment process ket political process no sadinno a ti proseso ket mabalin a kontrolen ti asinoman nga adda iti pulitika.
Mainaig iti daytoy, inpetteng ni Atty. Zarate a saan koma a pinatay nga insigida dagiti impeachment complaints tapno maipaayan ti gundaway nga idatag ni Marcos dagiti ebidensia kontra kadagiti maiyak-akusar kenkuana.
Innayonna a masapul a mapagsungbat dagiti nangangato nga opisial a karaman kadagiti anomalya tapno malappedan ti kumarkaro a mapaspasamak a panagkunniber ditoy pagilian.
Maipalagip a pinatibker iti plenario ti pannaka-dismiss iti impeachment complaints kontra ken ni Presidente Marcos kalpasan nga indeklarar ti House Committee on Justice nga “insufficient in substance” no sadinno nga adda ti 284 ti pimmabor, walo ti kimmontra ken uppat ti abstentions.
