LAOAG CITY – Manamnama a mapasaran dagiti driver ti dakkel a rollback iti presio dagiti produkto a petrolyo inton sumaruno a lawas mainaig daytoy iti agtultuloy a sumaysayaat a relasion ti Estados Unidos ken Iran.
Basar iti Department of Energy (DOE), manamnama a bumaba inton Hunio 23 ti P4 agingga P5 iti kada litro ti gasolina, P8 agingga P10 iti kada litro ti diesel idinto a ti kerosene ket P9 agingga P11 ti pagbabaanna iti kada litro.
Naobserbaran ti panagbaba ti presio mainaig iti situasion iti Middle East.
Kabayatanna, nagballaag met ti Department of Energy ti posibilidadna a saan nga agtultuloy daytoy a rollback gapu iti anunsio ti Switzerland a mabalin a saan a matuloy ti naikeddeng a panagsarita ti Estados Unidos ken Iran tapno mapatibker ti relasion dagiti dua a pagilian.
