BOMBO LAOAG – Inlawlawag ni Barangay Capt. Joseph Palafox iti Brgy. Sta. Cruz iti ili ti Badoc nga iti listaan ti registry of barangay in habitat ti nagibasaran da kadagiti naikkan ti relief goods iti barangay da.
Daytoy ket kalpasan a maipagarop a nagprobokar ti maysa a dati a kapitan iti nasao a barangay a ni Elma Apostol kalpasan a saan a nakaawat ti relief goods.
Inbatad ni Palafox a dagiti laeng nakarehistro ken agtaltalinaed iti nasao a barangay ti naikkan ti relief goods.
Naamoan a kalpasan ti panagibunong da Palafox ti relief goods iti checkpoint ti Purok 7 iti nasao a barangay, napan met ni Apostol ken maipagarop a pinagsawsaw-an na dagiti nakaduty.
Basar iti naidanon nga impormasyon kenni Palafox, maipagarop a nagriri ni Apostol gapu ta saan a nakaawat ti relief goods.
Inlawlawag ti kapitan nga uray dati a kapitan ni Apostol iti barangay da ket saan latta a naikkan gapu ta iti Brgy. Caraitan ti pagtaltalinaedan na.
Kabayatanna, nagpanawagan ni Palafox a masapol ti naan-anay a panagkikinnaawatan tapnu maliklikan ti riri ken sumurot kadagiti alagaden tapno malapdan ti panagwaras ti covid-19.
