LAOAG CITY – Inrakurak ti Department of Agriculture (DA) ti panagsagsagana nga aglako ti P40 iti kada kilo ti bagas.
Inbatad ni Agriculture Secretary Francisco Tiu Laurel Jr. a mangrugi daytoy no adu ti imported a bagas ti mapatawan ti nababbaba a taripa apaman a makasangpet ditoy pagilian kadagiti sumarsaruno a bulan.
Posible a dagiti bagas a mailaklako iti Rice-for-All program ket makissayan ti P5 iti kada kilo no lumag-an ti agdama a presio daytoy.
Kunana a no ti retail price ket dumanon iti P45 iti kada kilo ti bagas ket agbalin a P40 ti presio ti Rice-for-All program.
Maipalagip a nangrugi ti nasao a programa idi Agosto 1 no sadinno a mailaklako kadagiti well-milled rice manipud iti local importers ken traders ti P45 iti kada kilo nga addaan ti 25 a kilo a limit iti kada aldaw iti maysa a tao a daytoy ket nababbaba iti presio a P47 agingga iti P55 iti kada kilo.
