LAOAG CITY – Kinumpirmaran ti Department of Foreign Affairs (DFA) a makaawiden iti pagilian ni Mary Jane Veloso intono Disyembre 18.
Segun ken ni Department of Foreign Affairs Undersecreteray Tess Lazaro, iti oras ti ala-6 ti bigat ti Disyembre 18 ket addan ton ditoy pagilian ni Veloso.
Maipalagip a naarestar ti agtawen ti 39 a ni Veloso gapu iti panagbitbit na ti iligal a droga nga agdagsen ti 2.6 kilos iti Indonesia idi 2010.
Tawen 2015 idi kanselaren ni Presidente Joko Widodo ti pannakabitay kenkuana gapu iti maipagarop nga human trafficking.
Idi Hunyo 2023 ket binisita ti pamilya na idiay Yogyakarta ken idi Enero ket immapela da ken ni Presidente Ferdinand Marcos Jr para iti clemency na.
Inpakaammo met ni Presidente Marcos idi Nobyembre a naaddaan ti katulagan ti Pilipinas ken Indonesia nga iyakar iti pagilian ni Veloso no sadinno a nagyamanan na ti baro a presidente iti Indonesia a ni President Prabowo Subianto.
Immapela ti nagannak ni Veloso a no mabalin ket ikabil daytoy iti pasilidad nga addaan ti naiget a seguridad gapu iti panagamak da iti pangta manipod iti international drug syndicate.
