LAOAG CITY – Binalakadan ti Department of Health (DOH) dagiti deboto ita nga Holy Week a saan da a kasapulan a dangran ti bagida iti panagpenetensya kas ti panangilansa da iti krus ken panangsapli-saplit da ti bukot wenno self-flagellation.
Inbatad ni Health spokesperson Assistant Secretary Albert Domingo a saan a kasapulan a sugaten wenno saktan ti bagi kas ibalbalakad dagiti papadi.
Inpetteng na a no saan a maliklikan, pinalagipan ti opisyal dagiti deboto nga agusar laengen kadagiti banag a na-sanitize wenno panagusar ti antiseptic kas ti iodine tapno maliklikan a maimpeksiyon ken ugasan a nalaing dagiti sugat usar ti sabon ken nadalos a danom.
Innayon ti opisyal a dagiti sugat iti bagi iti panagpenetensya ket maaw-awagan ti “dirty wound”. Kuna na pay a mabalin a paggapwan ti mikrobiyo ti tapok manipod iti daga ken ti us-usaren iti panagpenitensiya.
Inpagunam-gunam pay ti Department of Health a saan nga agtapwak iti karayan wenno iti baybay ken dalusan a dagus ti sugat.
Inaramid ti ahensiya ti nagpalagip kagiddan ti tinawen a tradisyon ti kaadoan a deboto a Katoliko nga agpenpenitensiya tunggal nangina nga aldaw kas panangipeksa da iti panagbabawi kadagiti basol da ken lagipen ti naindaklan a sakripisyo ni Hesu Kristo iti babaen ti pannakailansa na iti krus ken pannakasapli-saplit ti bukot a maiyus-uswat tunggal Huwebes Santo ken Biyernes Santo.
