LAOAG CITY – Inpasingked ni Engr. Glenn Miguel, District Engineer ti Department of Public Works and Highways – First District Engineering Office a dagusda a sinolbar ti asphalt projects a nadadael gapu iti iduduprak ti Super Typhoon Carina babaen iti Maintenance Team.
Segun kenkuana, naiget pay ti panangmonitorda iti situasion iti Brgy. Pancian iti ili ti Pagudpud no sadinno adda dagiti naka-standby nga heavy equipment no bilang adda ti mapasamak a panagreggaay ti daga.
Inbatadna a dagus met a nawaknitan ti kalsada apaman nga adda ti landslide a napasamak iti nasao a lugar rason nga awan ti dakkel a problema a napasaranda.
Mainaig iti daytoy, kuna ni Engr. Miguel a nagbalin nga epektibo dagiti flood control projects-da maibasar kadagiti naawatda a komento manipud kadagiti maseknan a residente.
Innayonna a kalikagumda a mangipatungpal pay ti ad-adu a drainage canal nangruna kadagiti lugar a masansan a malaylayus.
