LAOAG CITY – Inbatad ti Department of Social Welfare and Development (DSWD) nga agtultuloy ti panangorganisar na kadagiti aktibidad iti adbokasiya tapno makatulong a maliklikan ti panagbully kadagiti pampubliko a pagadalan.
Kuna ni Assistant Secretary Irene Dumlao a naiget ti panangsuporta ti ahensya ti anti-bullying campaign ti Department of Education (DepEd) iti babaen ti panangiyuswwat ti capacity-building ken learning activities, aglalo kadagiti benepisyaryo ti Pantawid Pamilyang Pilipino Program (4Ps).
Inlawlawag ni Dumlao a ti bullying ti maysa kadagiti kangrunaan a makaapektar iti panagadal dagiti ubbing ken agtutubo.
Innayon na a tapno makatulong a mangsolbar iti problema ket mangiyus-uswat dagiti benepisyaryo ti programa kadagiti family development session (FDS) tapno ipakaammo kadagiti nagannak ti kinapateg ti kaadda ti makaay-ayo a pamilia ken aglawlaw ti pagadalan para kadagiti ubbing tapno malapdan ti panagbully.
