LAOAG CITY – Nangipaay ti Department of Trade and Industry ti Shared Service Facility a mausar para iti Footwear Industry iti ili ti Vintar kas panangipakita iti agtultuloy a suportada.
Inpakaammo ni Provincial Director Amelia Galvez iti Department of Trade and Industry, nabuangay ti proyekto iti napalabas a tawen.
Inbatadna a gapu ta addan dagiti ili ditoy nga agaramid iti bolero, arpaw ti lamisaan, ules, ken scarf usar ti inabel a tela, napanunutan ti grupo manipud iti ili ti Vintar ti panagaramid ti sandal wenno footwear tapno maidumduma ti produktoda.
Inlawlawagna a sakbay iti daytoy ket kinuyogda iti grupo a mapan iti Marikina ken Laguna, tapno maaddaan dagitoy iti ideya ken makapidot ti istratehia no kasano a mapagbalin ti produkto.
Innayonna a naruay ti training ti dimmalanan dagiti weaver tapno makasursuro a nasayaat dagitoy.
