LAOAG CITY – Kinumpirmaran ni Doctor Jose Orosa III, Officer-in-Charge iti Mariano Marcos Memorial Hospital and Medical Center (MMMHMC) idiay ciudad ti Batac nga iti agdama ket adda ti 53 a pasyente da nga apektado iti sakit dengue.
Iti eksklusibo nga interview ti Bombo Radyo Laoag ken ni Doctor Orosa, inbatad na a manipod iti nasao a bilang ket 45 kadagitoy ket ubbing, dua a masikog ken innem a nataengan.
Kuna na pay a 17 dagiti pasyente da ti adda iti covered court ti nasao nga ospital gapu ta isu ti pinagbalin da a temporary ward.
Inpakaammo na a nagtriple ti kaso a dengue iti nasao nga ospital ita a tawen no ikompara idi 2018 isut gapuna nga ibilang da daytoy a makaalarma.
Kabayatanna, immapela ni Doctor Orosa iti publiko nga agtitinnulong tapno maalay-ayan ti panagngato ti kaso a dengue ditoy probinsya.
Binalakadan na met dagiti nagannak nga agridam ken no addan dua nga aldaw nga aggurgurigor ti anak ket masapol nga ikabilen iti ospital.
