LAOAG CITY – Ballaigi ti naisayangkat a search operation iti Sitio Dimamaga, Barangay Tamdagan iti ili ti Vintar.
Nabigbig ti subject ti operasyon a ni Mr.Carlos Garcia, agtawen ti 54, naasawaan,mannalon,dati a miembro ti CAFGU ken residente iti nadakamat a barangay.
Iti panagsukimat dagiti otoridad iti uneg ti pagtaengan da Garcia ket nakaumpiskar da ti maysa nga hand grenade (m26 fragmentation), pito a pedaso ti bala ti shotgun, 11 a pedaso a bala ti caliber 22 a paltog, maysa a caliber 38revolver ken maysa a caliber 5.56 homemade (onepon).
Mainaig iti daytoy, inbatad ni Garcia nga awan ti ammo na kadagiti naala nga ebidensya kontra kenkuana gapu amin dagiti inus-usar na idi aktibo paylaeng daytoy a miembro ti CAFGU ket inturnover na amin kadagiti soldado idi nakisinan iti nasao a grupo.
Inpalgak na nga awan ti ammo na a nakabasbasolan na iti pada na a tao no apay a napasamak kenkuana daytoy.
Inpakaammo na nga idi agan-anop da paylaeng ket ti us-usaren da laeng ket ti silo ken bateng.
Kabayatanna, saan a ninamnama ni Barangay Chairman Jack Agraan iti Brgy 25, Tamdagan iti ili ti Vintar iti pannakaisayangkat ti operasyon iti balay ni Garcia ken masdaaw gapu ta adda pay dagiti naalanga ebidensya.
Kuna ti kapitan a ti laeng ammo na ket agtalon ti trabaho ni Garcia ken awan dagiti madi a rekord na iti barangay da.
Innayon na nga agan-anop pay idi ni Garcia ngem saanna nga ammono ania ti us-usaren na a paganop ngem nabayagen nga awan ti nakita na a naanupan na.
Iti sabali a bangir, inbatad ni Police Capt. Roi Manuel Ordonio, ti chief of police iti ili ti Vintar nga adda ti naidanun kadakuada nga impormasyon mainaig iti panagik-ikot ti subject ti operasyon iti paltog.
Gapu iti daytoy, nangiyuswat da a dagus ti surveillance ken adda dagiti nangpaneknek kadakuada a pudno nga adda ti ik-ikutan a paltog ti suspek a ni Mr.Carlos Garcia, agtawen ti 54, naasawaan,mannalon,dati a miembro ti CAFGU ken residente iti Sitio Dimamaga, Barangay Tamdagan iti ili ti Vintar.
Kuna na nga apaman a nakumpirmaran da ti impormasyon kadakuada ket nagaplikar da a dagus ti search warrant tapno mapan da agsukimat iti balay da Garcia.
Ditoy a nakumpiskar da ti maysa nga hand grenade (m26 fragmentation), pito a pedaso ti bala ti shotgun, 11 a pedaso a bala ti caliber 22 a paltog, maysa a caliber 38revolver ken maysa a caliber 5.56 homemade (onepon).
Inpakaammo ni Ordonio a nailanad pay iti search warrantti long firearm wenno shotgun ngem saan da a nakita daytoy, imbes ket nakakita da laeng ti sumagmamano a bala na.
Inpalgak ni Ordonio a gagangay laeng a paglibakan ti suspek ti alegasyon kenkuana ken paglibakan na a kukua na ti granada a naala iti balay na ngem nalawag ti inyuswat da nga operasyon.
Innayon na a nagayab da pay kadagiti eksperto a nangpidot ken nangibiayahe iti granada gapu ta delikado daytoy.
Gapu iti daytoy, sumango ti suspek ti illegal a panagikot ti granada,paltog ken balbala.
Iti agdama, nagtalinaed paylaeng ti suspek iti kustodyar ti Philippine National Police iti ili ti Vintar.
