LAOAG CITY – Dumanon iti maysa a milyon a pisos ti inlatang ti lokal a gobierno iti ili ti Vintar para iti burial assistance kadagiti poorest of the poor wenno dagiti kakukurapayan a residente wenno pamilia iti nasao nga ili nga agminatay.
Segun ken ni Vice Mayor Dr. Maribel Albano iti ili ti Vintar, daytoy ket kalpasan nga inaprobaran ti Sangguniang Panlalawigan ti Municipal Ordinance No. 2023-25.
Inbatadna a daytoy nga ordinansa ket para kadagiti maseknan a pamilia nga agminatay nga adda iti below poverty line wenno bassit iti mapaspastrekda iti inaldaw.
Inlawlawagna a saan a maipaay kas kuarta ti nasao a tulong pinansial no diket katukad ti 15 a ribu a pisos ti maited a tulong manipod iti punerarya a nakaikabilan ti bangkay, gastos iti ospital, dagiti masapol bayat ti pannakaimansayag ti bangkay ken dadduma pay.
Gapu iti daytoy, kuna ni Vice Mayor Albano nga addanto ti maiyuswat a Memorandum of Agreement wenno MOA iti nagbaetan ti Local Government Unit iti ili ti Vintar ken dagiti funeral homes nga isu ti mangasistir iti bangkay.
Kunana a masapol a naiget a maarisit dagiti agbalin a kualipikado ti mabenipisiaran iti nasao a burial assistance tapno ad-adda a matulungan dagiti marigrigat a residente.
Innayonna a no bilang awan ti kabagian ti natay ket maikkan ti authorization ti maseknan a Kapitan nga isu ti mangiproseso dagiti amin a kasapulan a dokumento tapno maka-avail ti nasao a burial assistance.
