LAOAG CITY – Nadismaya ti EcoWaste Coalition kalpasan a dagiti napili a pilgrimage sites ken pampubliko a lugar ket napunno ti basura ita nga Holy Week, iti baet ti namin-ado a daras a panagpawagan ti grupo para iti usto a panagibelleng ti basura ken panangpatalinaed a nadalos iti lugar ita a Semana Santa.
Segun iti grupo, nairekord ti ado a nakatambak a basura kadagiti kangrunaan a lugar ti panagselebrar ti relihiyon, karaman ti International Shrine of Our Lady of Peace and Good Voyage, Minor Basilica and National Shrine of Jesus Nazareno, ken Our Lady of Lourdes Grotto Shrine.
Sakbay a nangrugi ti Semana Santa, nangipaayen ti EcoWaste ti pammalagip kadagiti deboto nga ibelleng a nasayaat ti basura da.
Nupay kasta, iti monitoring ti grupo, nakita dagiti agkaiwarang a naruay a plastic bottles, food containers, ken leaflets kadagiti kalsada ken iti uneg dagiti simbaan.
Inpetteng ti grupo nga iti baet ti namin-adon a daras a panagpalagip da ket arigna nagbalinen a tradisyon ti panagiwaras ti basura dagiti Pilipino.
Nupay kasta, ginutigot ti environmental group ti amin aglalo dagiti mangidadaulo kadagiti simbaan ken deboto nga agtultuloy nga iwanwan ti responsibilidad para iti ecological conversion.
Manipod Hwebes Santo agingga iti Biernes Santo ket rinibo a deboto ti nakipaset iti tinawen nga ”Alay Lakad” nagturong iti International Shrine of Our Lady of Peace and Good Voyage iti Antipolo, a nangibati ti naruay a basura iti ruta, aglalo iti Pasig, Cainta, Taytay, ken Antipolo, no sadinno a ti Tikling Junction ket naestablisar kas maysa kadagiti kangrunaan nga hotspot ti panagiwaras.
Iti Quiapo, Maynila, nakita met dagiti naitambak a basura kadagiti kangrunaan a kalsada kas ti Quezon Boulevard ken C.M. Recto Avenue iti panawen ti 13 nga oras a prusisyon ti Black Nazarene, a nakipasetan ti nasurok a 500,000 a deboto.
Iti Our Lady of Lourdes Grotto Shrine iti San Jose del Monte, Bulacan, nakita a napno dagiti pagbasuraan ken dagiti naiwarang a basura iti Calvary Hill ken dagiti kaparanget a picnic areas, karaman dagiti food containers ken plastic bottles.
Kabayatanna, maibasar pay ti monitoring ti EcoWaste, bimmisita dagiti volunteers da iti 42 a simbaan iti Luzon, ken naobserbaran da nga adda ti sumagmamano a lugar a nagtalinaed a naurnus ken nadalos gapu iti istrikto a waste management practices.
Karaman ditoy ti National Shrine and Parish of the Divine Mercy ken sumagmamano a simbaan iti Bataan, Batangas, Cavite, Rizal, ken Metro Manila, kas ti Santo Domingo Church, a mangipatpatungpal ti waste segregation ken regular cleanups.
