LAOAG CITY – Saan a naan-ano ti babai a driver ti honda civic a naidungpar iti concrete barrier iti bypass bridge bisinidad ti Barangay Tangid ditoy ciudad ti Laoag.
Ti driver ket agtawen ti 35, empleado ti DPWH 1st Engineering District ken residente iti Barangay Pila ditoy ciudad.
Iti imbestgasyon dagiti kameng ti PNP-Laoag, bayat nga agpaabagatan a direksyon ti driver ket kellaat a napukawan ti kontrol gapo iti mechanical problem.
Gapo iti daytoy, nagpakannawan ti lugan ken naidungpar iti nasao a conrete barrier a nangitunda ti pannakadadael ti sangwanan ti parte ti behikulo.
Naamoan a no awan ti conrete barrier a nakaidungparan ti babai ket posible a nagderetso wenno naitapwak iti irrigation canal a paset ti nasao a barangay.
