LAOAG CITY – Saan a ninamnama ni Engr. Mark Roel Evangelista, manipud iti Mariano Marcos State University, residente iti Brgy. Poblacion Pudtol probinsia ti Apayao nu sadinno nagun-odna ti Top 4 iti Electronics Technician Lisencure Exam nga addaan ti ratings a 90.00 idinto a nakapasa pay daytoy iti Electronics Engineering Lisencure Exam.
Segun kenkuana, naragsak daytoy a nakagun-od ti arapaapna nga agbalin daytoy nga engineer iti pamiliada a naammuananna laeng ti resulta iti pagayamna babaen ti tawag ti telepono.
Kinunana nga addaan ti dua a semester iti panagreviewna babaen ti online review ken face-to-face iti Excel Review Center a nakabase iti Baguio City.
Kunana, naipagpannakkel dagiti dadakkelna gapu ta nakapasa iti eksamen ken impakaammona pay a saan a nalaka ti eksamen.
Kabayatanna, kayatna ti agtrabaho iti ballasiw-taaw iti masakbayan ngem umuna iti daytoy ket kayatna a makagun-od daytoy ti work experience ditoy pagilan.
