LAOAG CITY – Inlawlawag ni Mrs. Lourdes Ibañez, presidente ti Senior Citizens Affairs iti Barangay 18, Santo Cristo II iti ili ti Bacarra no apay a saan pay a anited ti death aid ti lima a bulanen a pimmusay a miembro a ni Imelda Piano.
Segun kenni Ibañez, no makasingir da ket dagus da met nga iremit iti main office da, ngem gapo iti pandemya ket saan pay a nakabayad ti amin.
Inbatad met ni Mrs. Marilou Sagao, treasurer ti Senior Citizens Affairs iti nasao a barangay a saan na nga ammo ti eksakto a nakolektar para kenni Piano gapo ta agiremit da met a dagus iti opisina da.
Mainaig iti daytoy, kuna ni Mr. Delfin Avena, ti Presidente ti Fedetared Senior Citizens Association iti ili ti Bacarra a saan pay a naited ti death aid ni Piano gapo ta ti barangay ket saan pay a nakasingir ti kontribusyon a maisubmitir iti federasyon nga isu ti mangted iti pamilya.
Inpalgak na a gapo ta saan pay a nagremit ti treasurer ti Senior Citizen Affairs iti nasao a barangay isut gapo na nga agpapan ita ket saan pay naited ti death aid a para kenni Piano.
Kunana nga isuda a mismo ket saan da nga ammo no apay a saan pay a nakaremit ti Barangay 18 iti koleksyon da.
Gapo iti daytoy, inpasigurado ni Avena a matratar daytoy a banag.
Ummuna iti daytoy, kalikagom ti pamilya ni Piano a malawlawagan no apay nga agpapan ita ket awan pay ti naawat da a death aid sipud natay ti kapamilya da.
Iti sabali a bangir, inadmitir ni Avena nga adda ti 777,640 a pisos a mapukpukaw a pondo ti federasyon basar iti resulta ti audit idi Oktubre 9, 2020.
Dinakamat na a saan nga isuna ti nakatugaw kas presidente ti federasyon idi napukaw ti nasao a pondo no diket ni Hertrodes Acoba.
Kunana nga adda ti memorandum of agreement a mabayadan ti mapukpukaw a pondo ken nangrugi ti panagbayad idi Pebrero iti naminsan a tawen.
Innayon na a saan na met a masungbatan no sadinno ti nakaipanan ti pondo nga iggem idi ti agnagan ti Mabelyn Ramir.
