LAOAG CITY – Nasurok a 300 a ballerinas idiay New York City ti nakairekord ti baro a world record kalpasan a naggigiddan dagitoy a nagsala kabayatan a nakatiklayda.
Kinumpirmaran ti Guinness World Record a ti ballet organization nga Youth America Grand Prix ti baro a record holder ti titulo a “Most Ballet Dancers en Pointe Simultaneously.”
Daytoy ket kalpasan a napagtitiponda dagiti 353 a ballerinas nga agsalsala kabayatan nga adda iti posision a maaw-awagan nga “en pointe” iti uneg ti maysa a minuto.
Ti “en pointe” ket ballet position no sadino agpada a nakatiklay ti saka dagiti ballerina.
Ti record breaking event ket naisayangkat idi Abril 18 iti The Plaza Hotel iti 5th Avenue idiay New York City.
Inaramid daytoy ti Youth America Grand Prix para iti selebrasion ti 25th anniversary dagitoy.
Segun iti Director of External Affairs ti nasao nga organisasion, babaen iti daytoy ket kalikagumda nga ipakita iti intero a lubong a ti panagsala ket makabukel ti grupo dagiti tattao.
