LAOAG CITY – Pinasingkedan ni Gob. Matthew Marcos Manotoc a kalpasan ti opisial a panagbisitada idiay Hawaii ket agturong dagitoy idiay Los Angeles, California.
Segun kenkuana, nangrugi ti panagbisitada idiay Honolulu idi Marso 10 ken nagpatinggada iti nadakamat a lugar idi laeng kalman idinto nga adda ti grupona idiay Los Angeles, California ken agpatinggada iti Marso 16.
Inbatadna a ti Filipino Chamber of Commerce in Hawaii ti orihinal a nangawis kadakuada rason a marekpan daytoy a panagbisitada idiay Hawaii iti forum a pakakaduaanda kadagiti amin a gunglo dagiti balikbayan iti open park a nangsangailianda iti immun-una a gundaway iti grupo ni Sen. Imee Marcos.
Inlawlawagna a dua dagiti kangrunaan a gagemda iti panagturongda kadagiti nadakamat nga estado ti Amerika.
Inbatadna nga umuna ditoy ti kalikagumda a mangawis kadagiti balikbayan nga agawid ditoy probinsia ken tapno gutigutenda dagitoy nga umay mangipasdek ti negosio ditoy Ilocos Norte.
Malaksid iti daytoy, kuna ti Gobernador a plano ti Ilocos Norte Tourism Office nga awisen dagiti Ilokano kangrunaanna kadagiti karaman iti baro nga henerasion dagiti Ilokano a naipasngay idiay Hawaii ken saan pay a nagawid ditoy probinsia tapno mismo a dagitoy ti mangkita no ania dagiti oportunidad a mabalin a maidiaya ti probinsia.
Mangnamnama a babaen iti daytoy ket maipamatmat ti grupona, saan laeng a kadagiti Pilipino ngem uray pay kadagiti Amerikano a ti Ilocos Norte ket saan laeng a napintas a destinasion ti turismo iti Pilipinas ngem iti intero a lubong.
