LAOAG CITY – Siraragsak a pinasangbay ni Gob. Matthew Marcos Manotoc dagiti opisial ti probinsia ti Misamis Oriental nga indauloan ni Gob. Peter “Sr. Pedro” Unabia.
Inpeksana ti napalaos a panagyamanna iti panangpili dagiti opisial ti nadakamat a probinsia iti Ilocos Norte a nangisayangkatan ti “benchmarking.”
Inlawlawagna nga iti kinadur-as ti Misamis Oriental ket saanna a masinunuo no kualipikado ti probinsia a pangiyuswatanda iti nasao nga aktibidad.
Nupay kasta, inpatalgedna a silulukat ti probinsia iti aniaman a kasapulan dagitoy ken aniaman ti kalikagumda a maammoan ket sindadaan ti probinsia a mangipaay.
Mangnamnama ni Gob. Manotoc nga adda ti maadal dagiti opisial ti Misamis Oriental iti iyuumayda ditoy probinsia.
Kagiddan daytoy, ginutigotna dagiti opisial a mangpasiar kadagiti lugar nga ipagpanpannakkel ti Ilocos Norte kas iti Sand Dunes, Windmills, White Sand Beach, Solsona-Apayao Road ken dadduma pay.
Malaksid iti daytoy, inpannakkelna dagiti agkakaimas a makmakan iti probinsia kangrunaanna iti empanada nga ipagtangtangsit iti siudad ti Batac a nagtaudan ti pamiliada.
Kabayatanna, inyawisna kadagiti bisita iti panagsublida ditoy Ilocos Norte kaduada dagiti kameng ti pamilia ken gagayyemda.
